التعدين سؤال و جواب

التعدين سؤال وجواب

سؤال : يعني ايه جهاز التعدين  ؟

جواب : جهاز كمبيوتر بيركب عليه اكتر من كارت شاشة وبتشغله لمراقبة شبكة عملة رقمية وعمليات ارسال واستقبال العملة واخذ اجر مقابل ده.

وفي أجهزة مخصصة للتعدين (antminer) لكن لن نتعرض لها في المنشور ده لأنها غير مناسبة للتشغيل في المجمعات السكنية لصوتها المزعج. 

سؤال : يعني ايه عملات رقمية ؟

جواب : العملات الرقمية او بتسمى العملات المشفرة هي بديلة عن العملات الورقية وبتتميز بسهولة التعامل بيها وسرعة نقلها ودرجة التشفير والحماية العالية ، بمعني انها مستحيل تتزور او تتكرر ، وحاليا بيتعامل بيها الملايين في العالم وآلاف مواقع الاستثمار والبيع والشراء والفنادق والمطاعم وخدمات تانية كتير .

سؤال : ايه سبب اختراع التعدين ده ؟ وايه اهميته ؟

جواب : زي ما قلنا التعدين مهم للعملات الرقمية لانه المسؤول عن سلامة العمليات الي بتتم داخل شبكة العملة الرقمية ، والتاكد انها سليمة ومش مزورة ولا مكررة

سؤال : محتاج ايه علشان اعمل جهاز تعدين ؟

جواب : هتحتاج جهاز كمبيوتر تقدر توصل عليه اكتر من كارت شاشة وباور كويس يقدر يغذي كروت الشاشة بالكهربا ووصلات ( رايزرات ) توصل كروت الشاشة باللوحة الام ( المازربورد).

سؤال : عندي كمبيوتر في البيت وعايز اشغله تعدين ، ينفع ؟

جواب : ممكن تشتري كارت شاشة او اكتر حسب ما الكمبيوتر بتاعك يسمح وتجيب باور كويس وتشتغل تعدين.

سؤال : ممكن اشغل كم كارت شاشة علي جهازي ؟ وينفع اشغل اكتر من باور ؟

جواب : حسب ما جهازك يسمح ، وحاليا في ماذربورد ممكن تشغل لحد 19 كارت ، وينفع تشتغل باكتر من باور صغير وتوصلهم ببعض او باور واحد كبير.

سؤال : ينفع اجرب علي الابتوب بتاعي ؟ او كارت شاشة عندي ؟

جواب : لازم كمبيوتر مكتبي وكروت شاشة معينة علشان يبقى في عائد والا هتبقى بتضيع وقتك وبتهلك جهازك 

سؤال : محتاج اعمل ايه بعد ما بجمع جهاز التعدين ؟

جواب : بعد ما بتجمع جهازك وتعرف كروت الشاشة ، بتعمل محفظة علي منصة التداول (Exchange) والي فيها بتقدر تبيع وتشتري العملات الرقمية ، وبتاخد عنوان للمحفظة بتاعتك (wallet) بتضيفه في برنامج بتستخدمه للتعدين (Miner) ، وبتختار موقع للتعدين (Pool) علشان يبعتلك ارباحك علي محفظتك باستمرار.

سؤال : انا باخد ارباحي ازاي ومن مين ؟

جواب : نظام العملات الرقمية بالكامل بيشتغل بشكل لا مركزي يعني محدش مسؤول عن دفع ارباح ، واتفقنا ان ارباحك بتاخدها مقابل تشغيل جهازك في خدمة عملة رقمية ، والارباح بتتولد بشكل تلقائي من شفرة العملة علي شكل جزء من العملة دي ، يعني محدش يقدر يوقفها ، وبتجيلك باستمرار علي المحفظة الي انت بتعملها لما بتبدا التعدين

سؤال : هقدر اقبض ارباحي ازاي في ايدي ؟

جواب : ارباحك هتبقى جزء من العملة الي انت بتعدنها ، والعملة دي ليها قيمة في منصات التداول وتقدر تبدلها بعملة البتكوين وتبيعها بعد كده لاي حد محتاجها ، وفي جروبات كتير مخصصة لبيع وشراء البتكوين والعملات الرقمية.

سؤال : هل الارباح بتبقى ثابتة ؟ واقدر احسبها ازاي ؟

جواب : الارباح متغيرة حسب سعر العملة الي بتعدنها ومستوى الصعوبة او التنافس في التعدين ( عدد الاجهزة المتصلة علي شبكة العملة دي ) و سعر دولار البتكوين ، وبتقدر تحسب ارباحك من قوة جهازك التعدينية وفي مواقع بتقدر تقولك ارباحك الشهرية بالتقريب.

سؤال : يعني ايه قوة تعدينية ؟ وقوتي بتتحدد بناء علي ايه ؟

القوة التعدينية هي قوة جهازك بالكامل في المشاركة في عملية التعدين وبتتحدد بقوة كروت الشاشة الي في جهازك ، وهي معروفة باسم هاش ريت.

سؤال : مش ممكن ينصب عليا واخسر فلوسي زي ما بيحصل في مواقع الاستثمار؟

جواب : الفرق بين اجهزة التعدين ومواقع الاستثمار ان جهازك معاك وقدام عينك وده جهاز كمبيوتر ليه سعره وقمته وكل قطعة فيه ممكن تبيعها بعد كده وهتلاقي الي يشتريها ، 

وقلنا ان ارباحك بتاخدها من برمجة وشفرة العملة نفسها ومحدش بيدفعها من جيبه والموضوع ده بيحصل بشكل تلقائي ولا مركزي ، يعني محدش ممكن ينصب عليك.

سؤال : جهاز التعدين محتاج سرعة نت عالية ؟ وبيصرف كهربا قد ايه ؟

جواب : انت مش محتاج سرعة نت عالية واي سرعة ممكن تشغل جهازك ، وكل كارت شاشة بيصرف كهربا من 100 ل 140 جنيه شهريا تقريبا.

سؤال : اجهزة التعدين اسعارها ايه وبتجيب ارباح ايه شهريا ؟

جواب : علشان تعمل جهاز تعدين كويس ب ٦ كروت شاشة هيكلفك 6 الاف جنيه تقريبا لتأسيس جهاز يشغل لحد 6 كروت شاشة ، وسعر الكارت الواحد من 1500 حتى 4000 من نوع rx4xx و rx5xxx  والعائد الشهري ٤٠٠ جنيه تقريبا شهريا قبل احتساب مصاريف الكهرباء ، والأسعار تقريبية وقت تحديث المنشور.

سؤال : لو معايا مبلغ ١٠ الاف او ١٥ الف وعايز ابدا بيهم اعمل ايه ؟

جواب : ممكن تبدا بمبلغ صغير وتكبر مشروعك مع الوقت ، وفي طريقتين لده

اما انك تشتري مكونات جهاز يشيل لحد ٦ كروت شاشة مستقبلا وده هيكلفك في حدود 6 الاف جنيه حاليا ، وطبعا ده مجرد التاسيس لجهازك وهتشتري بعد كده كروت شاشة ببقية الفلوس.

او انك تبدأ بكارت شاشة على جهاز مستعمل بأقل مواصفات.

سؤال : مش ممكن التعدين ده يقف او العملة دي تقع ؟

جواب : فكرة التعدين مش حكر علي عملة واحدة وفي عملات كتير ممكن نعدنها ، بس احنا بنختار العملة حسب العائد الاعلى ، والتعدين ضروري لاستمرار معضم العملات وفي استثمارات بملايين الدولارات في العملات الرقمية ، ولو فرضنا ان ده حصل فعلا فانت معاك كمبيوتر ليه سعره واستخداماته كتير في غير التعدين ، وكل قطعة فيه ليها سعرها.

سؤال : جهاز التعدين محتاج متابعة وتفرغ ؟ ممكن اريح جهازي كل قد ايه ؟

جواب : بمجرد ما تشغل جهازك ويستقر اداؤه مش هتحتاج اي متابعة ليه مجرد انك تبص عليه تتاكد انه شغال ، ومع الصيانة والتنظيف كل فترة، وانت هتقدر تعرف مجرد ما يفصل برسالة هتوصل علي ايميلك ، ومش محتاج تريح جهازك غير ساعة بالكتير كل اسبوع لو هتحافظ علي تهوية مناسبة للجهاز.

سؤال : العمر الافتراضي لجهاز التعدين قد ايه ؟

جواب : العمر الافتراضي مش اقل من ٣ سنوات وبيوصل ل ١٠ سنوات لبعض أجزاء الجهاز ، وده عمر مفترض ممكن تحصل مشاكل خلاله وممكن جهازك يكمل معاك عادي بدون اي مشاكل مع الاهتمام والصيانة.

سؤال : هي الاجهزة دي بضمان ؟ واعمل ايه لو باظ الجهاز مني ؟

جواب : معضم الاجزاء في اجهزة التعدين بضمان محلي او دولي بالاضافة لانها قطع كمبيوتر عادية ، مراكز صيانة كتير بتصلحها ، يعني مش حاجة غريبة محدش يقدر يفكها او يصلحها.

سؤال : هل محتاج تكييف او مروحة لجهاز التعدين ؟ وهل صوته مزعج ؟

جواب : هتحتاج تهوية مناسبة ومروحة او تكييف لجهازك في ايام الحر الشديد ، واحنا ممكن نتحكم في كهربا وحرارة الكروت بحيث نقلل من الحرارة واستهلاك الكهربا ، وكل كارت شاشة فيه مروحة او اتنين وفيه حماية في حالة ارتفعت درجة حرارته ، وصوت جهاز التعدين بكروت الشاشة زي صوت المروحة العادية علي اقل درجة .

سؤال : اقدر اشتري جهاز تعدين منين ؟ وهل متوفر في مصر ؟

جواب : احنا بنبيع اجهزة التعدين وكل مستلزماتها وكل الحلول التكميلية ليها ، ومعضم مستلزمات اجهزة التعدين موجودة في كل محلات الكمبيوتر.

سؤال : هل بحتاج حد يركبلي جهازي ويشغلهولي او ممكن اعمل ده بنفسي ؟

جواب : لو عندك خلفية في تركيب اجهزة الكمبيوتر هتقدر تركب جهازك بسهولة ، لكن لازم تشتغل بتوجيهات مهندس يفهم في توزيع الاحمال والاسلاك علشان جهازك يستحمل الشغل ويعيش ، وبعد تركيب جهازك محتاج كمان تضبط كروت الشاشة علي افضل اعدادات علشان تجيبلك اعلى عائد وارباح باقل استهلاك كهربا واقل حرارة .

سؤال : لو استثمرت مبلغ في اجهزة التعدين هقدر استرد راس مالي بعد قد ايه ؟

جواب : بحسب سعر شراءك للجهاز ومصاريفك وهل بتدفع كهرباء على استهلاكك او ممارسة ثابتة كل شهر وعموما خلال سنة تقريبا هيكون معاك راس مالك وجهاز او اجهزة التعدين الي بتشتغل بيها ، لكن تقدر خلال السنة دي تستثمر العائد الي بيطلعلك باستمرار وتكبر مشروعك وتزود ارباحك.

للموضوع بقية ....