تعدين البيتكوين - اعرف كل شيء عن التعدين

 ㅤ﷽ 

وبه نستعين

ده ملخص بسيط كدا (كبسولة) للتعدين

التعدين بيتم:

•  إما بجهاز متخصص لتعدين خوارزمية بعينها وبيبقى اسمه

 ASIC

وده اختصار لجملة

Application-Specific Integrated Circuit

يعني شريحة مخصصة لهدف واحد أو تطبيقات بعينها وبالتالي ما بيتمش إعادة برمجته لتعدين خوارزمية تانية هو ماكانش مجهز لها من أيام مرحلة التصنيع

- جهاز التعدين ال ASIC ده بيعدن خوارزمية واحدة (في الغالب الأعم يعني) وبالتالي بيعدن أي عملة شغالة بالخوارزمية دي، فمثلًا الجهاز اللي بيستخدم خوارزمية Sha256 ده بيعدن البيتكوين BTC أو البيتكوين كاش BCH أو البيتكوين إس في BSV وغيرها فقط، والجهاز اللي بيستخدم خوارزمية Scrypt بيعدن اللايت كوين LTC وأشباهها وجهاز ال X11 بيعدن الداش DASH وأشباهها وهكذا.

• وإما بجهاز كمبيوتر بنسميه

 Mining rig 

وده بيكون جهاز كمبيوتر عادي بس بدون كيسة بنركبه في فريم تعدين مفتوح (هتشوفه بالبحث على اليوتيوب) وبيتوصل عليه أكثر من كارت شاشة ومن الويندوز (أو اللينوكس) بتقدر عن طريق برامج تانية نستخدم الكروت دي في التعدين لعملات تانية (غير البيتكوين) وبنقدر نبدلها بعد كدا ببيتكوين أو بدولار عن طريق منصات التداول، وفيه كمان برامج زي nicehash تابعة لموقع نايس هاش بتعدن بكروتك دي وبتحول لك هي انتاجك من العملة لبيتكوين وبتدفع لك بالبيتكوين نتاج تعدينك وبتقدر تسحبه كل فترة

- ريج التعدين بكروت بتعدن بيه أي عملة المهم تكون صعوبة شبكتها بتسمح بكدا (يعني انسى انك تعدن بيه بيتكوين أو لايتكوين أو داش أو العملات اللي صعوبتها عالية دي كلها) وبيتم ده عن طريق برنامج تعدين لكل عملة وبعضها برضه بتقدر تعدن بنفس البرنامج عملة ثانية أو عملتين كمان في نفس الوقت زي ما بيتم في تعدين الإيثيريوم ETH أو الإيثيريوم كلاسيك ETC أو الزدكاش ZEC أو المونيرو XMR وهكذا

•#الصوت

- جهاز الآسيك ASIC صوته عالي علشان المراوح بتاعته دي صوتها عالي جدا (كأنك مشغل المكنسة ٢٤ ساعة) وممكن طبعا الاستغناء عنها وتغطيسه بالكامل في حوض زيت معدني mineral oil وده هيخلي مالوش صوت تقريبًا بس هتحتاج مكان مجهز وبمعزل عن أي أطفال، بكرر بمعزل عن أي أطفال.

- جهاز الكروت Mining rig صوته أخف بكثير لكن بيحتاج متابعة أكثر علشان لو كارت وقف ممكن يوقف الجهاز كله وفي كل الحالات الأجهزة يفضل متابعتها بشكل يومي وعدم استخدامها في أي أغراض أخرى علشان العطلة = فلوس بتفقدها بسبب اعادة تحميل ملف الداج واستقرار الشير على بوول التعدين، كمان لو متعدله بايوس فهو كدا بقى متخصص للتعدين مش للجيمز او التصميم وهيهنج أو يدي شاشة زرقاء BSOD لو حاولت تشغلهم عليه.

•#الشراء

- جهاز الآسيك ASIC ممنوع دخوله من الجمارك رسمي فعلشان تشتريه لازم تشتريه من حد قدر يدخله بالفعل وبيبيعه جوا مصر، وسواء مستعمل أو جديد فمابيبقاش عليه ضمان غير الدولي وده صعب تنفيذه وتسفيره للأفراد تاني لنفس سبب منعه، وإنما يقوم بائعوه في مصر بتقديم فترات ضمان استبدال أو استرجاع مختلفة بحسب الاتفاق (أو حتى بدون ضمان برضه) أو بحسب ما يوضحه البائع نفسه وأما المستعمل فالبيع يتم (على حالته) أو ما يعرف ب as is فما تراه هو ما تشتريه، وطبعًا لازم تجرب كل حاجة وخصوصًا في المستعمل.

- جهاز التعدين بكروت بتشتريه وبتركبه من السوق عادي سواء جديد أو مستعمل وبيسري عليه نفس قواعد الضمان في مصر زي أي قطع كمبيوتر، مع ملاحظة إن عملية تعديل البايوس لكروت الشاشة بتخرج الكارت خارج الضمان عند شركات كثير فيفصل العمل على البايوس الأصلي فقط بتاعه إذا كنت مقلق من الحتة دي، لاحظ برضه إن تعديلات البايوس بترفع الأداء وبالتالي بتزود الانتاجية وبتوفر شوية في الكهرباء وبالتالي بتقلل الحمل على الباور سبلاي بتاع الجهاز برضه.

•#الكهرباء

- جهاز الآسيك والتعدين كلاهما بيسحبوا كهرباء عالية تكاد (بقول تكاد) تقضي تكلفتها على إيراداته فالصح انك تعدن على كهرباء مجانية أو ممارسة إنما أي كهرباء بعداد رسمي أيا كان نوعه هتخرب بيتك (ده لا مؤاخذة يعني)

- بما أنك هتكون على كهرباء مجانية أو مبلغ ثابت (ممارسة) زي ما افترضنا فوق فمراوح كثير بقى للجهازين ودايما هتحتاج شفاط يخرج الهواء السخن لخارج الغرفة علشان يفضل جو الغرفة متجدد وما يجمعش حرارة building heat

 طبعًا يفضل تكييف علشان يفيدك في تبريد الجو خصوصًا في الصيف، وفيه تنظيم أو عزل لانسيابية الهواء بالغرفة ممكن يغنيك عنه.

•#المزيد

• أنا فيه مصطلحات ذكرتها بالإنكليزية بشكل متعمد لو كتبتها على اليوتيوب هتقدر تشوف بعينيك شكل كل حاجة وتسمع صوتها بنفسك.

 •#وأخيرا 

كلامي كله مالوش علاقة بمشاريع التعدين النصابة زي ماينينج سيتي والبيتكوين فولت وتريبل ماين أو باي نتوورك أو أي من الهطل المنتشر ده اللي بيستغلوا بيه قعدة الناس في البيت وبيلعبوا على مشاعرهم وطمعهم البشري.

بالتوفيق للجميع.

والسَّلاَمُ عَلَيْكُمْ وَرَحْمَة اللهِ وَبَرَكَاتُهُ

سبحانك الله وبحمدك، أشهد أن لا إله إلا أنت، أستغفرك وأتوب إليك.